Damen - Interclub 4. Runde
Wie bis jetz jedes Johr heimer s Päch, au am Stüblifäscht „miese" go Tennis spiele. Gwüssi si do vernünftiger aus angeri, aber spöter meh derzue.
Am besagte Stübli-Samschti simer vo de sympathische Gägnerinne us Bieu zur 4. Rundi am 9i uf dr schöne Alag diräkt am See empfange worde. Do paar Anekdote zu de jewilige Einzu: Jana, unsere allzeit starke Nummer 1... ...hed sich das Mou leider gägene früehcheri Juniorinne Förderspielerin knapp i drü Sätz miese gschlage gäh. Nach em Match heimer natürli s Spüu analysiert und öis gfrogt, wieso äs verlore hed. Si de zum Schluss cho: definitiv z vüu gfluecht während em Match und d Banane ersch während em Platz putze gässe = Energie falsch genutzt ;-) S Noe hed nur dank sine starke Närve im Scheri-Stei-Papier gäg s Jana gwunne und somit dörfe s Zwöi spiele. Nachdäm die beide Captains s Setzplatt ustuscht hei, isch de schnäu klar gsi, as s chliine Noe wieder einisch gäg die gröschti Gägnerin darf spiele. Danke Universum! Doch au das hed ihns nid vomne suveräne Sieg abghaute. Nachem Match isch aber wieder nur eis wichtig gsi: wie rot isch mi Chopf? S Nilla wo us Captain eigentlich chli e Vorbüudfunktion sed ha, hed wieder einisch maximau übertriebe. Nach 3h Schlof, eländ scheisse usgseh (danke Jana für dini Ehrlichkeit), hed äs offesichtlichi Startschwierigkeite gha. Hallo Karma. Doch us irgendeme Grund hed äs sich doch no chönne steigere und dr Match für Müme chönne heidue. Bider Heifahrt ischs de vom Team derzue verdonneret worde, e Powernap z mache, damitmer öise Sieg hei chönne go fiire. D Saisonpremiere hed s Sarah gha a däm Wucheänd, und das fulminant. Zwar mängisch chli verwirrt, aber doch suverän, hed äs sie erst Match ohni grossi Schwierigkeite gwunne. Mängisch hedem s Anita chli „positive vibes" miese ufe hingerscht Platz schicke. Me hed de dütlich gseh wenn die acho si, d Paume hed ame afo gwaggle.
D Doppu si schnäu verzöut. S Jana und s Noe hei churze Prozäss gmacht mit ihrne Gägnerinne und öis so Punkt Nr. 4 gsicheret. Und das ganz ohni Flueche... D Gägespielerinne vom Bettina und vom Sarah si de doch chli emotionaler ungerwägs gsi. Unerklärlicherwis hei die nachem Ispiele dr Platz nomou putzt. Aus wär das nid scho gnue „Profi", heisi au nach jedem (säutene) Pünktli no die Faust geballt. Jänu, aues nüt gnützt. Denn d Sisters hei verdienterwis au ihres Doppu gwunne und somit s Schlussresultat 5:1 besieglet. Amerke möchtemer no: Sarah mit Ass!
Die letschti Rundi (und mir wede betone: kei Abstiegskampf) fingt am 16.06. nomou Deheime statt. Fröie öis immer über Ungerstützig, hei übrigens au immer feins Buffet für aui, und hoffe mit chli Glück und natürlich Chönne ;-) no dr 2. Platz z egalisiere.